Tænasturáðstevnan 2024
Um uppstilling til Tænasturáðið
Henda kunning var send øllum bólkaumboðum fríggjadagin 9. februar.
Eitt sindur av orðaskifti hevur stungið seg upp um, hvussu vit skulu handfara uppstillingina til nýggja Tænasturáðið, reint praktiskt, hesaferð.
Tað mest ítøkiliga, sum stendur í Tænastuhondbókini frá 2016/17 um val av Tænasturáði er, at "Ráðslimirnir verða valdir fyri 2 ár í senn og kunnu veljast aftur. Ein ráðslimur kann í mesta lagi sita trý valskeið." 20. apríl í ár skulu vit tó velja eitt púra nýtt Tænasturáð, tí seinast valda Tænasturáð hevur ikki verið virkið í fleiri ár.
Til tess at royna at tryggja eitt virkisført Tænasturáð yvir tíð, hava vit skotið upp, at farið verður til at royna at tryggja eina regionala umboðan í nýggja Tænasturáðnum. Men av tí, at vit ikki hava regionalar nevndir, so ber nokk illa til at biða økini koma við valevnum, áðrenn sjálva Tænasturáðstevnuna.
Vit vilja tí hervið koma við einari áheitan á tey, sum ætla sær at stilla upp til nýggja Tænasturáðið um at møta upp á Tænasturáðstevnuni 20. apríl. Har fara nøvnini á teimum uppstillaðu at vera sett á ein atkvøðuseðil, alt eftir hvat øki í landinum tey umboða, og so fara umboð fyri allar fundirnar, sum eru møttir á Tænasturáðstevnu at atkvøða um, hvør skal manna nýggja Tænasturáðið.
Innkalling, skrá o.a.
Við hesum verður kallað inn til Tænasturáðstevnu í Missiónshúsinum í Vestmanna leygardagin 20. apríl 2024, kl. 14:00. Bústaðurin er Gerðisvegur 31, Vestmanna.
Dagsskráin fyri ráðstevnuna er hendan:
1) Val av fundarstjóra og skrivara
2) Frágreiðing um virksemið hjá nevndini, ið varð sett á bólkafundinum í Vestmanna 9. september 2023
3) Val av tveimum grannskoðarum, ið taka sær av atkvøðugreiðslunum
4) Atkvøðugreiðsla um uppskot til broytingar í Tænastuhondbókini 2016/17, ið nevndin frá 9. september 2023 hevur skotið upp
5) Val av Tænasturáði og 2 varalimum til ráðið
6) Atkvøðugreiðsla um mál, sum nevndin frá 9. september 2023 metir, at nývalda tænasturáðið eigur at fara undir beinanvegin
7) Ásetan av tíð og stað fyri næstu Tænasturáðstevnu
8) Mál sum limir hava sett á dagsskrá
9) Ymiskt
Nevndin, sum varð vald á bólkafundi í Vestmanna 9. september 2023, fekk álagt at taka stig til eina Tænasturáðstevnu, sum skal vera í apríl 2024. Høvuðsendamálið við komandi Tænasturáðstevnuni er at velja eitt nýtt Tænasturáð.
Nevndin hevur havt nakrar fundir har kjakast m.a. hevur verið um hvussu vit kunnu royna at tryggja, at landsumfatandi arbeiði hjá AA-felagskapinum í Føroyum kemur í eina so virkisføra legu sum til ber. Í hesum sambandi hevur nevndin trý broytingaruppskot til Tænastuhonbókina frá 2016/17.
Uppskot til broytingar í “Tænastuhondbók fyri AA í Føroyum - 2016/17”
Nevndin metir at tað er dekan ov ambitiøst, sum nú er, at krevja at minst tveir árligir bólkaumboðsfundir verða hildnir afturat árligu Tænasturáðstevnuni, og skjýtur tí upp, at hildin verður minst ein bólkaumboðsfundur um árið afturat Tænasturáðstevnuni.
Bólkaumboðsfundir, s. 4
Minst tveir bólkaumboðsfundir eiga at vera millum árligu Tænasturáðstevnunarnar, harav annar skal vera seinast í januar ella fyrst í februar.
verður broytt til:
Minst ein bólkaumboðsfundur eigur at vera millum árligu Tænasturáðstevnurnar, hann skal vera í oktober mánaði.
Nevndin skilir, at ein av orsøkunum til at Tænasturáðið áður er hildið uppat at virka er manglandi forstáilsi millum ymisku økini í landinum. Til tess at royna at tryggja eina so breiða landafrøðiliga umboðan í Tænasturáðnum sum til ber, skjýtur nevndin upp at gera ein valleist, ið tekur støði í, at AA-felagsskapurin er ein landsumfatandi felagskapur.
Tænasturáðið, undirnevndir og arbeiðsbólkar, s. 6
Aftaná 3. reglubrot verður skrivað:
Tænasturáðið eigur at verða sett saman á henda hátt:
1 limur umboðar Norðoyggjar
1 limur umboðar Eysturoy
1 limur umboðar Tórshavn – herundir eisini Nólsoy og Sandoy
1 limur umboðar Vágar / Norðstreymoy
1 limur umboðar Suðuroy
Letur samansetingin frammanfyri seg ikki gera, eigur Tænasturáðið at verða sett saman á ein hátt, sum í minsta lagi hevur hesa umboðan:
1 limur umboðar Norðoyggjar / Eysturoy
1 limur umboðar Tórshavn – herundir eisini Nólsoy og Sandoy
1 limur umboðar Vágar / Norðstreymoy / Suðuroy
Ber ikki til at seta Tænasturáðið saman eftir leistunum omanfyri, verður ráðið mannað upp til 5 ráðslimir og 2 varalimir uttan at atlit verður tikið til økini.
Hildið verður at tað er ov avmarkandi at krevja at bara limir, sum hava verið edrúir í minsta lagi 4 ár ella longur kunnu vera valdir í Tænasturáðið. Til tess at royna at tryggja bæði kontinuitetin og feskleikan í Tænasturáðnum verður skotið upp, at tænasturáðslimir skulu hava verið samanhangandi edrúir í minsta lagi 2 ár ella longur, men hava verið í felagskapinum í minsta lagi 5 ár ella longur.
Valbæri til Tænasturáðið, s. 7
Í Tænasturáðið kunna bert veljast persónar, sum hava verið edrúir í minsta lagi í 4 ár.
verður broytt til:
Í Tænasturáðið kunnu bert veljast persónar, sum hava verið í felagskapinum í minsta lagi í 5 ár, og hava verið samanhangandi edrúir í minsta lagi í 2 ár undan valinum.
Fráboðanarfreistir o.t.
Nevndin frá 9. september 2023 heldur seg í høvuðsheitum til seinast samtyktu tænastuhondbókina frá 2016/17 í mun til formligar ásetingar um Tænasturáðstevnuna. Har stendur m.a. at:
· Allir AA-bólkar í Føroyum kunnu velja sær eitt umboð, sum hevur atkvøðurætt til Tænasturáðstevnuna.
· Allir AA-limir kunnu møta á Tænasturáðstevnuni, tó uttan atkvøðurætt.
· Tænasturáðstevnan kann bert viðgera mál, sum standa á dagskránni fyri Tænasturáðstevnuna.
· Bólkar og limir kunnu senda mál inn til viðgerðar á Tænasturáðstevnuni.
· Øll innkomin mál eiga at hava verið viðgjørd í einum AA-bólki ella á einum bólkaumboðsfundi.
Seinasta freist hjá bólkum og limum at senda mál til viðgerðar á Tænasturáðstevnuni er 1. apríl 2024.
Ætlanin er at borðreiða við smyrjibreyði á Tænasturáðstevnuni. Heitt verður á bólkar og limir, so frætt til ber, um at boða okkum frá hvussu nógv ynskja at fáa smyrjibreyð.
Fráboðanirnar skulu sendast á teldupostin: aavestmanna.hoskvold20@gmail.com